كل عــام وانتم بالف خير …

حقيقي الليلة دي ترجع بيا لوراء ولذكريات كثير عزيزه وجميلة على قلبي ..ترجع بيا ( لليلة العيد ) في طفولتي كانت اجمل للية في حياتي انتظرها طول الشهر واحياناً طول السنة على الحلم بالفستان المزكرش والاسوار الذهب اللى راح تشترلي هي ماما ..والبيجاما الجديده اللى شفتها ساعة ما اشترتها ماما وبعد كده ..رفعتها عندها بالدولاب ..وتضرب مدافع العيد ..وتقوم ماما تحممني ..وتلبسني البيجاما ..ويجوا عندنا في البيت خالاتي وخيالني كلهم ..وبعدين قبل الفجر ماما تلبسني فستاني ونروح صلاة العيد ..الله ما اجمله من احساس ..ونطلع بعد الصلاة ونروح نفطر في بيت جدي لانه كل العيلة تفطر هناك ..وهنا في فرحة تانية وهي ( العيديات ) والله يسمع كده يقول يالطيف قد ايش كترها في الغالب خمسة ريال من جدي وعشرة من خالتي و30 من خالي ..طبعا الثلاثين ما اخدتها الا لما صار عمري 12 سنة ..يجي تاني يوم نروح لبيت خالتي في ( الصحيفه ) حي من احياء جدة العريق ..وهناك اجمل عيد في مريجيه خشب اللفه او الدورة فيها بثلاثة ريال قد ايش كانت امتع مدينة ملاهي …( بينما اولادي دحين اوديهم احسن ملاهي في العيد من حيث التقدم والتكنلوجيا ..وبرضو مو عاجبتهم ) انا بالمرجيحه دي البسيطة كنت في قمة سعادتي وبعد العب ياتي دور البحر نطلع البحر وناخد معانا فرشة ونجلس على طرف البحر الكبار يشربوا الشاي والصغار يلعبوا بالرمل جنب البحر ونضل على هذا البسط لحد صلاة المغرب نصلي وبعدها نمشي على البيت طبعا نكون رجعنا متخمين من اللعب والسعادة اكلنا حلاوة قطن وبليلة ..نتعشي وننام ..

اولادي ..بلبسوا ملابس با اسعار تعتبر خيالياً بالنسبة لفستان العيد حقي ..واحلى طلعات واحلى عيد ..وهما مش مبسوطين ..وطول الوقت ..نق وحركان ..( ماما هو دا العيد بس كده يعني !!؟ )

مو عاجبهم العجب ولا الصيام برجب ..

اتاري العيد نابع من فرحة القلب والظاهر دا الجيل ما يعرف يفرح ..

يبقى العيد جميل وتبقى ذكرياته عبقه في روحي ..

وتبقى ليلة العيد ..جميلة داخلي وذكرياتها أجمل ..

تمنياتي لكم بأيام عــــيد سعيد ..

بقلمي / الحجازيه …